काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले प्रधानन्यायाधीश चोलेन्द्रशम्शेर जबराले राजीनामा गर्दैमा वा महाभियोग लगाएर हटाउँदैमा न्यायालय नसच्चिने बताएका छन्।

मंगलबार नेपाल बार एशोसिएसनको टोलीसँग आफ्नै निवास बालकोटमा भएको भेटमा अध्यक्ष ओलीले जबराको राजीनामाबाट मात्रै न्यायालय सुधार नहुने बताए।

‘तपाईंहरुको कुरा थुप्रै जायज छ’ कानुन व्यवसायीहरुलाई ओलले  भने, ‘तर, (प्रधानन्यायाधीशको राजीनामा) प्रस्थान विन्दु होइन, अन्त्य हो । त्यसबाट न्यायिक सुधार अगाडि जान्छ भन्ने होइन, पूर्णविराम लगाउने कुरा हो ।’

मंगलबार दिँउसो बारका अध्यक्ष शाक्य र नेपाल बारका अध्यक्ष चण्डेश्वर श्रेष्ठको नेतृत्वमा अधिवक्ताहरु बार एसोसिएसनको कार्यालयबाट बालकोट गएका थिए। भेटमा प्रधानन्यायाधीश जबराको बहिर्गमनका लागि संवैधानिक प्रक्रिया (महाभियोग) अघि बढाउन अनुरोधसहितको ज्ञापनपत्र पूर्वप्रधानमन्त्री समेत रहेका ओलीलाई बुझाएका छन्।