चितवन । नेकपा एमालेका अध्यक्ष केपी शर्मा ओलीले १० हजार पूर्वलडाकुहरु एमाले प्रवेश गर्ने दाबी गरेका छन्।

शुक्रबार पार्टीको दशौं राष्ट्रिय महाधिवेशनको उद्घाटन समारोहलाई सम्बोधन गर्दै ओलीले आगामी दिनहरुमा जनयुद्धमा घाइते भएकादेखि पूर्वलडाकुहरु सबैको जिम्मा एमालेले लिने बताए। ओलीले आगामी दिनहरुमा १० हजार पूर्वलडाकुहरु एमाले प्रवेश गर्ने दावी पनि गरे।

यस्तै, अध्यक्ष ओलीले कार्यकर्ताहरुलाई अब चुनावको तयारीमा जुट्न निर्देशन दिदै बहुमत ल्याउने भन्दै भने, ‘हामी चुनावको तयारीतर्फ जाने छौं, एकल बहुमत ल्याउने छौं ।’

कार्यक्रममा प्रधानमन्त्री शेरबहादुर देउवातर्फ इंकित गर्दै पूर्वप्रधानमन्त्री समेत रहेका ओलीले पहिले आफ्नो खुट्टा तान्नेहरु अहिले देउवाको खुट्टा समाउन पुगेको बताए।

यस्तै, कार्यक्रमा अध्यक्ष ओलीले पार्टीको आधिकारिक मुखपत्र इनवयुग डटकमको शुभारम्भ गरेका थिए।