काठमाडौँ । त्रिभुवन अन्तर्राष्ट्रिय विमानस्थलबाट अवैध लागूऔषध चरेस बोकेर कतारको दोहा जान लागेका दुईजनालाई विमानस्थल प्रहरीले पक्राउ गरेको छ।

पक्राउ पर्नेमा म्याग्दीको मंगला गाउँपालिका–३ घर भएका ३६ वर्षीय श्याम प्रसाद रोका र ३५ बर्षीय वीर बहादुर रोका मगर रहेका छन् ।

प्रहरीका अनुसार सोमबार बिहान विमानस्थलको प्रस्थान कक्षबाट ४ किलो ३५ ग्राम अवैध लागूऔषध ‘चरेस’सहित उनीहरुलाई पक्राउ गरिएको हो।

उनीहरु कतार एअरको उडानमार्फत दोहा जान लागेका थिए । विमानस्थलमा खटिएको प्रहरीले चेकजाँच गर्दा उनीहरुको सुटकेसभित्र चरेश फेला परेको बताइएको छ।

पक्राउ परेका उनीहरुमाथि लागूऔषध ‘चरेस’ मुद्दामा जिल्ला अदालत काठमाडौंबाट म्याद लिएर लागूऔषध नियन्त्रण ब्यूरोले अनुसन्धान गरिरहेको जनाएको छ।