काठमाडौं । प्रधानमन्त्री केपी शर्मा ओलीले गरेको प्रतिनिधिसभा विघटनका कारण राष्ट्रपति विद्यादेवी भण्डारीमाथि लगातार प्रश्न उठ्दै आएको छ ।

सर्वोच्च अदालतमा संसद विघटनविरुद्ध प्रमुख प्रतिपक्षी दलका नेता शेरबहादुर देउवासहित १४६ जना सांसदले दिएको रिटमाथि जारी बहसमा वकीलहरुले राष्ट्रपति र प्रधानमन्त्रीको नियतमाथि प्रश्न उठाएका हुन् ।

आज रिट निवेदकका तर्फबाट बहस गर्दै वरिष्ठ अधिवक्ता श्रीहरी अर्यालले राष्ट्रपति र प्रधानमन्त्रीको काम बदनियतपूर्ण भएको आरोप लगाए ।

‘प्रधानमन्त्रीले संविधानको पालना गर्छु भनेर शपथ खानुभयो । त्यो भनेको उहाँले विश्वासको मत लिन्छु भनेर शपथ खानुभो तर, आफैंले खाएको शपथको पालना गर्नुभएन । राष्ट्रपतिले संसदमा जानका लागी बाटो फुकाई दिनुपर्नेमा टिकट टाँसेको चिठीलाई (जसपा र प्रधानमन्त्रीले पठाएको पत्रलाई संकेत गर्दै) आधार मानेर बदनियतपूर्ण निर्णय गर्नुभो,’ अर्यालले भने।