काठमाडौँ। नेपाल कम्युनिष्ट पार्टी (नेकपा) एमालेका नेता एवं प्रधानमन्त्री केपी शर्मा ओलीका प्रेस सल्लाहकार सूर्य थापा पछिल्लो समय माधव नेपाल पक्षका नेताहरुमाथि खरो रुपमा प्रस्तुत भएका छन्।

सल्लाहकार थापाले एमालेका माधव नेपाललाई गद्दारको संज्ञा दिँदै आफ्नो पार्टीको सरकार ढालेर कांग्रेस सभापति शेरबहादुर देउवाको पाउमा लम्पसार परेको आरोप लगाएका छन्।

नेपाल पक्षले पार्टी २०७५ जेठ २मा फर्किनु पर्छ, अध्यक्ष ओलीले त्यसपछि गरेका एकलौटी निर्णयहरु फिर्ता लिनुपर्छ भन्दै माग गरेको बेला सोही पार्टीका नेता समेत रहेका थापाले पार्टी पछि नफर्किने र अघि बढ्ने बताएका छन्।

केहीदिन अघि मात्रै कोरोना संक्रमण भएर आइसोलेसनमा बसेका थापाले हिजो मात्रै पनि माधव नेपाललाई पाखण्डीपनको संज्ञा दिएका थिए।

आज मध्यान्ह सामाजिक सञ्जाल ट्वीटरमार्फत् नेता जन्माउने-बनाउने पार्टी र जनताले हो भन्दै आफ्नै सरकार ढाल्नेहरुलाई क्षम्य नहुने उल्लेख गरेका छन्।

पार्टी २०७५ जेठ २मा फर्किनु हुँदैन,
२०७८जेठ २तर्फ अघि बढ्नुपर्छ।
आफ्नाे सरकार ढालेर देउवाकाे पाउमा
लम्पसार पर्नेहरूकाे गद्दारी क्ष्यम्य हुनसक्दैन।
नेता जन्माउने-बनाउने पार्टी र जनताले हाे।
महान शुद्धीकरण र सुदृढीकरणकाे
प्रक्रियामा अघि बढाै।
सुकेका पात झर्छन चिन्ता नगराैं। pic.twitter.com/Wzs4avAIDz

— Surya Thapa (@ThapajiSurya) May 11, 2021