काठमाडौं । नेपाल कम्युनिष्ट पार्टी (नेकपा) एमालेका नेता एवं पुर्व श्रम, रोजगार तथा सामाजिक सुरक्षामन्त्री गोकर्ण विष्टले पार्टीमा देखापरेका समस्याहरुको समाधानकालागि संयमीत र जिम्मेवारीपूर्ण पहल गर्नुपर्ने बताएका छन् ।

नेता बिष्टले सामाजिक संजाल  फेसबुकमा स्टाटेस लेख्दै एकपछि अर्को एकतर्फी र बिनाकारण सांसदहरुमाथी कारबाहीका शृखंलाहरुले पार्टी एकतामा गम्भीर संकट पैदा गरेकाे बताएका हुन् ।

संवादहीनता र कारबाहीको बाटो कुनैपनी हालतमा समस्या समाधान नहुने बताउँदै अदालतको फैसला बमोजिम एमालेलाई नेकपा एकतापूर्वको अवस्थामा फर्काएर पार्टीलाई विचार र विधिबाट संचालन गरेर पार्टी एकता जोगाउन आग्रह समेत गरेका छन् ।

उनले लेखेका छन्, ‘विगत केहि समय यता नेकपा एमालेमा देखापरेका समस्याहरुको समाधानकालागि संयमीत र जिम्मेवारीपूर्ण पहल गर्नुको साटो एकपछि अर्को एकतर्फी र बिनाकारण सांसदहरुमाथी कारबाहीका घटनाहरु अघि बढाइएको छ । यस्ता कारबाहीका शृखंलाहरुले पार्टी एकतामा गम्भीर संकट पैदा गरेको छ । संवादहीनता र कारबाहीको बाटो कुनैपनी हालतमा समाधान हुन सक्दैन । अदालतको फैसला बमोजिम एमालेलाई नेकपा एकतापूर्वको अवस्थामा फर्काएर पार्टीलाई विचार र विधिबाट संचालन गरेर नै एकता जोगाउन सकिन्छ । एउटा इमान्दार कार्यकर्ताकोलागि पदीय हैसियत भन्दा पार्टी र आन्दोलनको भविष्य सधैं माथी हुन्छ । यसर्थ एमालेका नेता, कार्यकर्ता, समर्थक र शुभचिन्तकको चाहना बमोजिम एकतापूर्वको एमालेका सम्पूर्ण आधिकारिक कमिटीहरु ब्युँताएर विधि मार्फत समाधान खोज्न म आग्रह गर्दछु । पार्टी एकताको रक्षा गरौं ।’

आज पार्टी अध्यक्ष केपी शर्मा ओलीले पार्टीका ३२ जना नेताहरुलाई कारवाही गरेपछि नेता बिष्टले सामाजिक सञ्जालमार्फ़त पार्टी एकताको रक्षा गर्न गुहार गरेका हुन्।