काठमाडौं । प्रधानमन्त्री केपी शर्मा ओलीले प्रतिनिधिसभा विघटन गरेसँगै एक भएका तत्कालीन नेकपा अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल प्रतिनिधिसभा पुनर्स्थापना भएसँगै अलग हुन पुगेका थिए ।

प्रधानमन्त्री ओलीको प्रतिगमनकारी शैलीलाई परास्त गर्ने भन्दै एकजुट भएर लागिपरेका प्रचण्ड र नेपाल सर्वोच्चको फैसलापछि अलग हुन बाध्य भएका हुन् ।

यतिबेला, प्रचण्ड माओवादी केन्द्रका अध्यक्ष हुन् भने नेपाल एमालेका बरिष्ठ नेता ।

तर उनीहरु पार्टी विभाजन भएपनि भेटघाटमा ब्यस्त रहेको स्रोतले बताएको छ।

यस्तैमा हिजो कोटेश्वरस्थित व्यवसायी चन्द्रलाल श्रेष्ठको घरमा प्रचण्ड, नेपाल र नारायणकाजी श्रेष्ठसहितको बैठक बसेको थियो । सो बैठकपछि नेपालले ओलीमाथि १३ बुँदे प्रश्नसहितको स्पष्टीकरण पठाएका थिए ।

त्यस्तै, आज बिहान अर्का व्यापारी टपेन्द्र तिमल्सिनाको घरमा बिहान साढे ८ बजेदेखि दुई घण्टाभन्दा बढी प्रचण्ड र नेपालबीच छलफल भएको स्रोतले जनाएको छ ।

पार्टी अध्यक्षसँग असन्तुष्ट रहदै आएका नेपाल पछिल्लो समय प्रचण्डसँग व्यस्त हुनुलाई गम्भीरताका साथ हेरिएको छ।