काठमाडौं । महानगरीय प्रहरी परिसर काठमाडौंले दुगड आइरन उद्योग तथा कजरिया टायल्सका प्रवन्ध निर्देशक प्रकाश दुगडलाई पक्राउ गरेको छ ।

निर्देशक दुगडलाई कालिमाटी क्षेत्रबाट बैंकिङ कसुर मुद्दामा पक्राउ गरेको प्रहरीले जनाएको छ ।

दुगडलाई उनको ताहाँचलस्थित घरबाट कालिमाटी वृतले पक्राउ गरेर कमलपोखरीमा बुझाएको परिसरका एसपी रमेश बस्नेतले बताए ।

पक्राउ परेका दुगड कालिमाटी सोल्टीमोडमा रहेको होटल प्लाटिनियमका सञ्चालक पनि हुन् ।

व्यापारी दुगडले खातामा रकम नभएको चेक दिएपछि कमलपोखरी वृत्तमा जाहेरी परेको थियो ।

गत माघ १९ गते उच्च अदालत पाटनकी न्यायाधीश रेखा थापा पाण्डेले दुगड र सरिता प्रधानबिरुद्व पक्राउ पुर्जी जारी गरेकी थिइन् ।

दुगड पाँच लाख ३७ हजार बिगो बराबरको कसुरमा मोस्ट वान्टेड रहेका थिए।