काठमाडौं । प्रधानमन्त्री एवम् नेपाल कम्युनिष्ट पार्टी (नेकपा) ओली समूहका अध्यक्ष केपी शर्मा ओलीले आफैले मन्त्री बनाएका योगेश भट्टराईलाई केटाकेटीको संज्ञा दिएका छन् ।

शनिबार काठमाडौंमा कार्यकर्ता भेलालाई सम्बोधन ओलीले भने–‘म वैगुनी केटाकेटीको कुरा गर्न चाहन्न । प्रदेश नं. १ मा पनि त्यस्ता देखिएका छन् । दौडी दौडीकन गएर भोट मागेर यो केटालाई जिताएर पठाउनुस्, मन्त्री बनाएर पठाइदिन्छु भने । मन्त्री बनाएर … गरियो गरियो । एक दिन त पुक्क लात्ताले हानेर भाग्यो । को भनेर यसो हेरेका त उहि केटो ।’

आफ्नो पार्टीमा युवाहरुको कुनै कमी नभएको भन्दै प्रधानमन्त्री ओलीले यस्ता झिना मसिना कुरामा आफूहरु नअल्झिने बताए । सम्बोधनका क्रममा ओलीले युवाहरुलाई अझै अरु युवाहरुलाई पनि समेट्न आग्रह गरे ।

प्रतिनिधिसभाको निर्वाचनमा ओली तेह्रथुम पुगी योगेशलाई जिताउन आग्रह गरेका थिए। ओलीले त्यसबेला योगेशलाई मन्त्री बनाएर पठाउने प्रतिवबद्धतासमेत जनाएका थिए। प्रधानमन्त्री ओलीले पुस ५ गते प्रतिनिधि सभा विघटन गरेसँगै योगेशले मन्त्री पदबाट राजीनामा दिएका थिए।