काठमाडौं । महानगरीय प्रहरी बृत्त कालिमाटीको हिरासतबाट ४ जना थुनुवा फरार भएका छन् । बिहीबार राति प्रहरी हिरासतबाट उनीहरु हत्कडीसहित फरार भएका हुन् ।

प्रहरीले राति गस्तीका क्रममा चोरीको आशंकामा पक्राउ गरी ल्याएका ती चार जनालाई आइसोलेसनमा राखिएको थियो । कोरोना परीक्षण नगरी हिरासतमा राख्न नपाउने भएकाले आइसोलेसन जोनमा राखिएको थियो ।

राति कोरोना परीक्षण सम्भव नभएकाले आइसोलेसन जोनमा हत्कडी लगाएर राखिएका उनीहरु फरार भएका थिए । हिरासतबाट फरार हुनेहरुमाअनिल जैसवाल, सुजित गुप्ता, अशु जैसवाल र रविन्द्र जैसवाल छन् ।

कालिमाटी बृत्तका डीएसपी अपिल बोहराले उनीहरु फरार भएको स्वीकार गरे । उनले भने–‘तरकारी र फलफूल गाडीबाटै चोरी हुने गरेको गु्नासो आएपछि राति ३ बजे गस्तीको क्रममा हिंडिरहेका उनीहरुलाई पक्राउ गरी ल्याइएको बताए ।

कोभिड परीक्षण नगरिएकाले आइसोलेसन जोनमै राखिएको अवस्थामा फरार भएका हुन् । थुनुवा होइनन् । चोरीको आशंकामा सोधपुछका लागि ल्याइएका हुन् ।’ आरोपी फरार भए पनि एउडा हत्कडी प्रहरीले बरामद गरेको छ ।