दाङ । दाङको तुलसीपुरमा खोलामा आएको बाढीले अटो बगाउँदा दुई महिला बगेर बेपत्ता छन् ।

बेपत्ता हुनेमा खाद्रे गाउँकी ५६ बर्षीया सीता आले र सुर्खेत जिल्ला घर भई खाद्रे गाउँमै बस्दै आएकी १७ वर्षीया मञ्जु खड्का रहेका छन् ।

शुक्रबार बेलुका तुलसीपुर बजारबाट खाद्रे गाउँ जाँदै गरेको रा १ ह ४०५५ नम्बरको पाँच जना सवार अटो तुलसीपुर– ४ स्थित बेतनी खोलामा आएको बाढीले बगाएको थियो ।

खाद्रे गाउँका चालक ४६ वर्षीय हरिकिशन विक, स्थानीय ३४ वर्षीया सुनिता थापा र ७ वर्षीय सुशान्त आले भने खोलामा आएको बाढीबाट उत्रन सफल भएका थिए। आमा सुनिताले छोरा सुशान्तलाई जोगाएकी थिइन।

खोलाले बगाएर बेपत्ता रहेका सीता आले र मञ्जु खड्काको खोजी जारी रहेको इलाका प्रहरी कार्यालय तुलसीपुरले जनाएको छ ।