लद्दाखमा सीमा विवादलाइ लिएर फेरि झडप भएकाे छ। पछिल्लोपटक आइतबार राति सीमा क्षेत्र लद्दाखमा चिनियाँ सेनासँग भएको झडपमा एक भारतीय सैनिकको निधन भएको बेलायती पत्रिका द गार्डियनले समाचार लेखेकाे छ।

उक्त पत्रिकाका अनुसार भारत र चीनका सैनिकबीच प्याङगोङ क्षेत्रमा भएको भिडन्तमा भारतको विशेष सुरक्षा बलका एक सैनिक मारिएका हुन्।

चिनियाँ सेनाले सहमति उल्लंघन गरेकाले आइतबार राति झडप हुन पुगेको भारतीय पक्षको आरोप छ । तर उसले के कति क्षति भयो भन्नेबारे अहिलेसम्म केही बताएको छैन भने चीन पक्षबाट त यसबारे कुनै जानकारी नै सार्वजनिक गरिएको छैन ।

गत जुन १५ तारिखमा पनि पूर्वी लद्दाखको गलवान उपत्यकामा दुई देशका सैनिकबीच हिंसात्मक झडप हुँदा भारततर्फ २० जना मारिएका थिए ।