काठमाडौं । एसीसी प्रिमियर कपको तेस्रो स्थानको लागि भएको खेलमा नेपाल पराजित भएको छ।

शनिबार ओमानमा भएको खेलमा नेपाललाई हङकङले चार विकेटले पराजित गरेको हो । हारसँगै नेपाल एसिसी इमर्जिङ टिम्स कपमा छनोट हुन असफल भएको छ ।

यसअघि शुक्रबार भएको सेमिफाइनलमा नेपाल युएईसँग पराजित भएको थियो। जसका कारण फाइनल जित्दै एसिया कप खेल्ने नेपालको सपना चकनाचुर भएको थियो।

शनिबार नेपालले दिएको १४० रनको लक्ष्य हङकङले ६ विकेटको क्षतिमा ३ बल बाँकी छँदा पूरा गर्यो। हङकङको लागि अंशमान रथले नटआउट ६५ रन जोडे।

यसअघि ओमानको अल अमिरत ग्राउन्डमा टस जितेर पहिले ब्याटिङ गरेको नेपालले ८ विकेट गुमाएर १३९ रनको योगफल तयार पारेको थियो ।