दाङ । घोराहीमा टिपरको ठक्करबाट साइकल यात्रीको मृत्यु भएको छ । मृत्यु हुनेमा घोराही उपमहानगरपालिका–१७ भैंसाहीका ४५ वर्षीय कालीप्रसाद चौधरी रहेका छन् ।

घोराहीबाट लमहीतर्फ जाँदै गरेको नम्बर नखुलेको टिपरले साइकलमा सवार चौधरीलाई शुक्रबार राति घोराही–१७ सिस्नेखोलामा ठक्कर दिएको थियो ।

ठक्करबाट घाइते चौधरीको उपचारका क्रममा राति नै राप्ती स्वास्थ्य विज्ञान प्रतिष्ठान घोराहीमा मृत्यु भएको प्रहरीले जनाएको छ ।

घटनापछि स्थानीयले घोराही-लमही सडक अवरुद्ध गरेका छन् । अहिले टिपरको खोजी भइरहेको र सडक खुलाउने प्रयास जारी रहेको जिल्ला प्रहरी कार्यालय दाङले जनाएको छ ।