कैलाली । अछामको चौरपाटी गाउँपालिकाले आज बिहीबार शोक बिदा दिएको छ ।

ललितपुरको बालकुमारी घटनामा मारिएका सोही गाउँपालिकाको वडा नम्बर १ का बीरेन्द्र शाहको शोकमा गाउँपालिकाले एक दिनको सार्वजनिक विदा दिएको हो ।

शुक्रबार बसेको गाउँ कार्यपालिका बैठकले शोक प्रस्ताव पारित गर्दै मृतकको परिवारलाई एक लाख ५० हजार प्रदान गर्ने निर्णय गरेको थियो ।

बिहीबार गाउँपालिकाभित्रका शैक्षिक संस्था, सरकारी, गैरसरकारी कार्यालयहरुमा शोक बिदा छ ।

गएको शुक्रबार ललितपुर महानगरपालिका-८ बालकुमारीस्थित ईपीएस कोरिया शाखा कार्यालय अगाडि भएको प्रदर्शनको क्रममा प्रहरीको गोली लागेर अछामका वीरेन्द्र शाह र दैलेखका सुजन राउतको मत्यु भएको थियो।