काठमाडौं । आइसीसी एकदिवसीय विश्वकपमा भारतले लगातार चौथो जित निकालेको छ । पुणेमा भएको खेलमा भारतले बंगलादेशलाई ७ विकेटले पराजित गरेको हो ।

बंगलादेशले दिएको २५७ रनको लक्ष्य भारतले ४१.३ ओभरमा तीन विकेटको क्षतिमा पूरा गर्‍यो । भारतको जितमा विराट कोहली १०३ रनमा अविजित रहे ।

त्यस्तै केएल राहुलले अविजित ३४ रनको योगदान दिए । भारतका लागि शुभम गिलले ५३, कप्तान रोहित शर्माले ४८ र श्रेयस लयरले १९ रन बनाए ।

यसअघि टस जितेर ब्याटिङ गरेको बंगलादेशले निर्धारित ओभरको खेलमा ८ विकेट गुमाएर २५७ रन बनाएको थियो । बंगलादेशका लागि लिटन दासले सर्वाधिक ६६ रन बनाए । त्यस्तै तन्जिद हसनले ५१, महुमुदुल्लाहले ४६, मसुफिकर रहिमले ३८ रन बनाए ।

यो जितपछि पनि भारत अंक तालिकाको शीर्ष स्थानमा भने उक्लिन सकेन । उसले चार खेलबाट ८ अंक जोडेको छ । नेट रन रेट राम्रो हुँदा न्यूजिल्याण्ड शीर्ष स्थानमा छ ।