काठमाडौं । स्वास्थ्य तथा जनसंख्या मन्त्रालयले लकडाउन (बन्दाबन्दी ) खुलेपछि नेपालमा संक्रमित संख्या बढेको जानकारी गराएको छ ।

मन्त्रालयले लकडाउन खुलेपछि रोकथामका प्रयास पालना नगर्दा संक्रमण बढेको जनाएको छ । विशेषगरी सामाजिक दूरी कायम नगर्ने, सीमा नाकाबाट स्वाब संकलन नगरी भित्रिन दिने र मास्क नलगाउने गर्दा संक्रमणको खतरा झनै बढेर गएको छ ।

मन्त्रालयले देशको प्रमुख प्रशासनिक केन्द्र सिंहदरबार, सरकारी कार्यालयहरूमै सुरक्षाका मादण्ड पालना नभएको भन्दै चिन्तासमेत व्यक्त गरेको छ ।

सरकारले ११ चैतबाट गरेको लकडाउन १२० दिनपछि अर्थात ७ साउनबाट खुल्ला गर्ने निर्णय गरेको थियो ।

मन्त्रालयले लकडाउन खुलेपछिको अवधिमा देशभर कोरोना भाइरस संक्रमितको संख्या बढेको जनाएको हो ।

मन्त्रालयका प्रवक्ता डा। जागेश्वर गौतमका अनुसार लकडाउन खुल्नु अगाडिको ११ दिनको अवधिमा ४७ हजार ८७७ जनामा पीसीआर परीक्षण गरिएकोमा १ हजार ३४५ जनामा संक्रमण देखिएको थियो । यो भनेको २.८ प्रतिशत हो ।

लकडाउन खुलेको ११ दिनमा भने ५८ हजार १७४ जनाको पीसीआर परीक्षण गरिएकोमा १ हजार ९२ जनामा संक्रमण पुष्टि भएको छ । यो संख्या ३.६ प्रतिशत हो । गौतमका अनुसार, बन्दाबन्दी खुलेपछि ०.८ प्रतिशत संक्रमण बढेको हो ।