काठमाडौं । सञ्चार तथा सूचना प्रविधिमन्त्री रेखा शर्माले शासकीय व्यवस्थामा भएका कमीकमजोरीलाई सुधार गर्दै मुलुकको उपलब्धिहरूलाई संस्थागत गर्नुपर्ने बताएकी छिन् ।

गणतन्त्र दिवसका अवसरमा बिहीबार काठमाडौंमा आयोजित तस्बिर प्रदर्शनीको उद्घाटन गर्दै मन्त्री शर्माले यस्तो धारणा राखेकी हुन् ।

मन्त्री शर्माले गणतन्त्रमा देखिएको समस्याहरू समाधान हुँदै जाने भएकाले यसको विकल्प पश्चगमन हुन नसक्ने भन्दै प्राप्त उपलब्धिहरूमाथि विभिन्न तवरबाट हुने प्रहारलाई रोक्न कमजोरीलाई सुधारेर लैजानुपर्ने बताईन् ।

गणतन्त्र दिवस मनाइरहँदा २००७ साल यता भएका त्याग, बलिदान र आन्दोलन लगायतका संघर्षलाई भुल्न नहुने उनले तर्क गरिन् ।

जेठ १७ गतेसम्म चल्ने प्रदर्शनीमा सातै प्रदेश एवं काठमाडौं उपत्यकाका गरी ७७ तस्बिर राखिएको छ ।