काठमाडौं । नेकपा माओवादी केन्द्रका सचिव तथा सांसद देवेन्द्र पौडेलले कांग्रेस महामन्त्री गगनकुमार थापालाई सरकारलाई सहयोग गर्न आग्रह गरेका छन् ।

प्रतिनिधि सभा बैठकपछि सञ्चारकर्मीसँग आइतबार कुराकानी गर्दै सचिव पौडेलले यस्तो आग्रह गरेका हुन् । उनले सरकारलाई सफल बनाउने जिम्मेवारी गठबन्धन दलका प्रमुख नेता भएकाले कांग्रेस महामन्त्री थापाको पनि भएको बताए ।

उनले थापाले सार्वजनिक मञ्चहरूबाट सरकारको आलोचना गरिरहेको भन्दै आलोचनाले सरकार सफल नहुने बताए । उनले सरकारको आलोचना नगरी सहयोग गर्न आग्रह गरे ।

गठबन्धनलाई जोगाएर जनताको अपेक्षाअनुसारको काम गर्नुपर्ने उनको भनाई छ । पौडेलले सरकारका कमी, कमजोरीबारे सल्लाह, सुझाव दिनुपरे प्रधानमन्त्रीलाई भेटेर दिन महामन्त्री थापालाई आग्रह गरे ।