काठमाडौं । रुपन्देहीको कोटहीमाई गाउँपालिकाका तत्कालीन प्रमुख प्रशासकीय अधिकृत तथा बोलपत्र मूल्यांकन समितिका अध्यक्ष नेत्रप्रसाद घिमिरेसहित ७ जनाविरुद्ध अख्तियार दुरुपयोग अनुसन्धान आयोगले भ्रष्टाचारको मुद्दा दर्ता गरेको छ ।

कोटहीमाई गाउँपालिका–१ दानव नदीको सिपवा नाकाबाट नदीजन्य पदार्थ उत्खनन् गर्न टेन्डर प्रक्रियामा रकम बाँडेर टेण्डरको मूल्य घटाई ठेकेदारसँग आर्थिक लाभ लिई राज्यलाई हानिनोक्सानी गरेको भन्दै बुधवार विशेष अदालतमा मुद्दा दर्ता गरेको हो ।

दानव नदीको सिपवाघाट बालुवा उत्खनन्, संकलन तथा बिक्रीवितरण ठेक्का एआरके निर्माण सेवालाई प्राप्त गराउन नविन निर्माण सेवा, एआरके निर्माण सेवा र दुबेजी निर्माण सेवाका प्रोप्राइटरहरूले आपसमा मिलेमतो गरी भ्रष्टाचार गरेको अभियोग पत्रमा उल्लेख छ ।

३ वटै निर्माण सेवाको बीओक्युनिरज श्रीवास्तव भन्ने जीवन श्रीवास्तवले भरी दर्ता गरे गराएको र ३ वटै निर्माण सेवाको बीओक्यूमा लेखिएका हस्तलिखित अंक र अक्षर आँखाले हेरी एउटै व्यक्तिले लेखेको छुट्याउन सकिने अवस्थामा पनि मिलेमतो गरी बोलपत्र मूल्यांकनमा अनियमितता गरेको पाइएको हो ।

बोलपत्र मूल्यांकन समितिले सार्वजनिक खरिद ऐन २०६३ र सार्वजनिक खरिद नियमावली २०६४ बमोजिम बोलपत्र परीक्षण नगरी मूल्यांकन समितिका अध्यक्ष तथा तत्कालीन प्रमुख प्रशासकीय अधिकृत नेत्रप्रसाद घिमिरे, इन्जिनीयर मोहम्मद नुरुल हुसेन खाँ,

एआरके निर्माण सेवाका प्रोप्राइटर कमलेशप्रसाद बर्मा (कोहार), नविन निर्माण सेवाका प्रोप्राइटर जयप्रकाश लाल श्रीवास्तव, दुबेजी निर्माण सेवाका प्रोप्राइटर अशोककुमार दुबे, निरज श्रीवास्तव भन्ने जीवन श्रीवास्तव र सन्दीप तिवारी भन्ने सन्दीपकुमार त्रिपाठीको मिलेमतोमा अनियमितता गरिएको हो ।

सबैभन्दा बढी कबोल अंक रहेको निर्माण सेवाको बीओक्यूबोलपत्र खोल्नुभन्दा अगाडिको अवधिमा परिवर्तन गराई एकभन्दा बढी व्यक्तिले अंक र अक्षर लेखी लेखाई बोलपत्रदाताको दस्तखत महलमा अर्कै दस्तखत गराई फर्मको छाप महलमा अर्कै छाप लगाइएको अभियोग पत्रमा उल्लेख छ ।

बीओक्यूको कबोल रकमको अंक महलमा केरमेट एवं मुचुल्कामा अंक र अक्षरमा केरमेटसमेत गरी सहीछाप नगरेको कैफियत जनाई निर्माण सेवाको बोलपत्रलाई अयोग्य ठहर गरी ठेक्काको न्युनतम रकमभन्दा थोरै कबोल अंक रहेको एआरके निर्माण सेवालाई ठेक्का दिई ४३ लाख ७० हजार रुपैयाँ राजस्व चुहावट गरी भ्रष्टाचारजन्य कसुर गरेको भन्दै मुद्दा दर्ता गरिएको अख्तियारले जनाएका छन् ।