काठमाडौं । काठमाडौंको ४ नम्बर निर्वाचन क्षेत्रका उम्मेदवार गगनकुमार थापालाई अभिनेता प्रदीप खड्काले पनि भोट मागेका छन् । बुधवार बुढानिलकण्ठ नगरपालिका–१२ कपन क्षेत्रमा घरदैलो अभियानका क्रममा भेटिएका अभिनेता खड्काले थापालाई भोट मागेका हुन् ।

लामो कपाल, कालो चस्मा र कालो ज्याकेटमा सजिएका प्रदीपले गगनलाई शुभकामना दिदैँ गगनका लागि भोट समेत मागे । ‘दाइलाई कसरी बुझ्नुभएको छ ? त्योअनुसार स्वविवेक प्रयोग गरौं भन्छु,’ प्रदीपले भने, ‘आजसम्म गगन दाइले गरिरहेको काम ठीक लागिरहेको छ । भविष्यमा पनि उहाँजस्तै युवाहरूको आवश्यकता हो जस्तो लाग्छ भने गगन दाइलाई भोट गरौं ।’

यसअघि अभिनेत्री केकी अधिकारीे पनि गगनको प्रचारप्रसारमा लागेकी थिइन् । दर्जनौं कार्यकर्ताका साथ गगन घरदैलोमा दौडधुप गरिरहेका छन् ।

चुनाव प्रचारको समयसीमा सकिन लाग्दा कांग्रेसका महामन्त्री समेत रहेका गगनले प्रचारप्रसारलाई थप सक्रिय बनाउँदै दिनभरजसो मतदातासामु पुगेर भोट माग्न व्यस्त छन् ।