काठमाडौं । भारतबाट स्वदेश फर्कदै गर्दा सिमामा नै मृत्यु भएका युवकमा कारोना संक्रमण पुष्टि भएको स्वास्थ्य तथा जनासंख्या मन्त्रालयले जनाएको छ ।

गत जेठ १० गते भारतबाट अर्घाखाँची आउँदै गर्दा सिमापारी नै उनको मृत्यु भएको थियो ।

तर, उनको मृत्युलाई कोरोनाका कारण नेपालभित्र मृत्यु भएकाको संख्यामा गन्ने कि नगन्ने भन्ने अन्यौल देखिएको थियो । तर, आज मन्त्रालयले कोरोनाका कारण ६ जनाको मृत्यु भएको जानकारी गराएको हो ।

११ गते स्वाव संकलन गरिएकोमा १५ गते साँझ मात्र रिपोर्ट पोजेटिभ देखिएको स्वास्थ्य तथा जनसंख्या मन्त्रालयले जनाएको हो ।

अर्घाखाँची भूमिकास्थान नगरपालिका–९ चरेपानीका ति युवकको कपिलवस्तु ल्याएर पोस्टमाटम गरिएको थियो भने त्यहीँबाट स्वाब निकालेर कोरोना परीक्षणका लागि भैरहवा जनस्वास्थ्य प्रयोगशालामा पठाइएको थियो ।

घर फर्किने क्रममा मृत्यु भएका युवकको शवलाई उनको आफन्तले सन्धिखर्कस्थित गच्चे भन्ने स्थानमा गाडेका थिए।

ति युवासँगै भारतको गुजरात हुँदै दुईटा बसमा अरु नेपालीहरु पनि आएका थिए ।

उनले बाटोमा साथीहरुसँग खाना खाएपछि वान्ता गरेका थिए । आगरा पुगे पछि मृतकले छाती दुखेको बताएपछि लखनउ अस्पतालमा लैजानेक्रममा उनको बाटामै मृत्यु भएको थियो ।

दुई वटा बसमा कुल ९८ जना यात्री थिए । उनीहरुको तथ्या‌ंक संकलन सुरु भइसकेको मन्त्रालयले जनाएको छ ।

यसअघि नेपालमा सिन्धुपाल्चोक, बाँके, गुल्मी, बारा र ललितपुरमा गरी पाँच जनाको कोरोनाका कारण ज्यान गइसकेको छ ।