काठमाडौं । परराष्ट्रमन्त्री डा. आरजु राणा देउवाले नयाँदिल्ली जाने तयारी गरेकी छिन् ।

स्रोतका अनुसार उनले नियमित स्वास्थ्य परीक्षणका लागि आगामी साता नयाँदिल्ली जाने तयारी गरेकी हुन् ।

यद्यपि ‘औपचारिक भ्रमण’ कै रूपमा उनी नयाँदिल्ली जाने छिन् । नियमित स्वास्थ्य परीक्षण गराउन जाने भएपनि भारतीय पक्षले उनको भ्रमणलाई औपचारिक रूप प्रदान गर्न लागेको बताइएको छ ।

विभिन्न स्वास्थ्य समस्या देखिएपछि डा. राणाको १५ चैत २०८० मा नयाँदिल्लीको साकेतस्थित म्याक्स अस्पतालमा हाइपर पाराथोरोडिज्मको शल्यक्रिया गरिएको थियो ।

भ्रमणका क्रममा उनले भारतीय समकक्षी एस. जयशंकरसँग नयाँदिल्लीमा भेटवार्ता गर्ने स्रोतले बतायो ।