काठमाडौं । नेकपा एमालेका सांसद गोकुल बाँस्कोटाले कांग्रेस र एमाले गठबन्धनपछि च्याँखे दाउको राजनीति सकिएको बताएका छन् ।

मंगलबार प्रतिनिधिसभाको विशेष समयमा बोल्दै सांसद बाँस्कोटाले यस्तो बताएका हुन् । उनले नेकपा माओवादी केन्द्र र रास्वपालाई सत्ताबाट हट्नुपर्दाको पीडा नओकल्न आग्रह गरे ।

सांसद बाँस्कोटाले २०८४ सालको चुनावमा तरक्की मार्न सुझाव दिए ।

सांसद बाँस्कोटाले भने,‘थोरै सिटको च्याँखे दाउको राजनीति सकियो, खाल उठ्ने भयो, टाट उल्टिने भयो भन्ने पीडा नराख्नुस् । २०८४ सालमा तरक्की गर्नु न, संविधान संशोधनले के फरक पार्छ ?’

सांसद बाँस्कोटाले ३२ सिटको दलले सत्ताको तालाचाबी लिने म्याण्डेट जनताले दिएका होइनन् भन्ने माओवादीले नबुझेको बताए ।

सांसद बाँस्कोटाले दुई-दुईपटक सरकारमा गएको दल रास्वपा अब नयाँ नभएको टिप्पणी गरे ।

सांसद बाँस्कोटाले विकास, निर्माणको काममा ध्यान दिनुपर्ने बेलामा सत्तापक्ष र प्रतिपक्षबीच संसदमा आरोप/प्रत्यारोप हुनु शोभनीय नभएको पनि बताए ।