काठमाडौं । अर्थमन्त्री वर्षमान पुनले ‘विनियोजन विधेयक, २०८१’ राष्ट्रियसभामा प्रस्तुत गरेका छन् ।

बिहीबार बसेको राष्ट्रियसभाको बैठकमा मन्त्री पुनले राष्ट्रियसभा नियमावली, २०७५ को नियम १३३ (क)को उपनियम (२) बमोजिम उक्त विधेयक प्रस्तुत गरेका हुन् ।

आगामी आर्थिक वर्ष २०८१–८२ को सेवा र कार्यका लागि सङ्घीय सञ्चित कोषबाट रकम खर्च गर्नेसम्बन्धी अधिकार दिन र सो रकम विनियोजन गर्न बाच्छनीय भएकाले विधेयक पेस गर्नुपरेको मन्त्री पुनले बताए ।

यसैगरी राष्ट्रियसभाका सचिव डा सुरेन्द्र अर्यालले ‘विनियोजन विधेयक, २०८१’ का सम्बन्धमा प्रतिनिधिसभाबाट प्राप्त सन्देश सभासमक्ष टेबुल गरेका थिए ।

बैठकमा प्रधानमन्त्री तथा मन्त्रिपरिषद्को कार्यालयबाट प्राप्त मन्त्रिपरिषद् सदस्यको कार्यभार तोकिएकोसम्बन्धी पत्रको व्यहोरा जानकारी गराइएको थियो ।