काठमाडौं । कोशी सरकार गठनविरुद्धको रिट आज पूर्ण इजलासमा सुनुवाइको पेशी तोकिएको छ ।

पूर्वमुख्यमन्त्री केदार कार्कीले दायर गरेको रिट न्यायाधीशहरू प्रकाशकुमार ढुंगाना, अब्दुल अजीज मुसलमान र सुनिलकुमार पोखरेलको इजलास परेको हो।

कार्कीले एक महिनाअघि २७ वैशाखमा सर्वोच्च अदालतमा रिट दायर गरेका थिए ।

यसअघि संयुक्त इजलासमा सुनुवाई भएको रिट आजबाट पूर्ण इजलासमा सुनुवाइ हुन लागेको हो ।

पूर्ण इजलासमा आज कोशी सरकार गठन विरुद्धको मुद्दा मात्रै छ ।

गत बुधबार न्यायाधीश तिलप्रसाद श्रेष्ठ र बालकृष्ण ढकालको संयुक्त इजलासले पूर्ण इजलासमा पठाउने आदेश गरेको थियो ।

एउटा मुख्यमन्त्रीलाई पदमुक्त नगरी संविधान विपरीत अर्को मुख्यमन्त्रीको नियुक्ति भएको भन्दै केदार कार्कीले दायर गरेको रिटमा अन्तरिम आदेश माग गरिएको छ ।