काठमाडौं । नेपाली कांग्रेसले राष्ट्रियसभा बैठक पनि अवरुद्ध गर्ने जनाएको छ ।

कांग्रेसले सरकारका नीति तथा कार्यक्रम प्रस्तुत गर्न दिने र त्यसपछि बस्ने बैठक भने अवरोध गर्ने बताएको हो।

मंगलबार अपराह्न ३ बजे संघीय संसदको संयुक्त बैठकमा राष्ट्रपति रामचन्द्र पौडेलले सरकारका नीति तथा कार्यक्रम प्रस्तुत गर्दैछन्।

लगत्तै प्रतिनिधिसभा र राष्ट्रियसभामा बैठक बस्नेछ। उक्त बैठक दुवै सदनमा अवरोध गर्ने राष्ट्रियसभामा कांग्रेस संसदीय दल नेता रहेका कृष्णप्रसाद सिटौलाले बताए ।

सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै कांग्रेसले संसदीय छानबिन समिति गठनको माग गर्दै आएको छ।

नेता सिटौलाले अध्यक्ष नारायणप्रसाद दाहालसँग नीति तथा कार्यक्रम पेस गर्दा अवरोध नगर्ने र त्यसपछि बैठक अवरोध गर्ने जानकारी गराए।

राष्ट्रियसभा अध्यक्ष दाहालले राष्ट्रिय सभामा प्रतिनिधित्व गर्ने राजनीतिक दलका नेताहरूसँग संसद भवन बानेश्वरमा मंगलबार दिउँसो छलफल गरेका थिए।