काठमाडौं । नवनियुक्त अर्थमन्त्री वर्षमान पुनले सबै क्षेत्रको मनोबल बढाउने गरी आर्थिक क्षेत्रको सुधार गर्न सकारात्मक पहल गर्ने बताएका छन् ।

अर्थ मन्त्रालयमा पुगेर पदभार ग्रहण गर्दै उनले यस्तो बताएका हुन् । उनले सबै उद्योगी व्यवसायीलाई साथमा लिएर अर्थतन्त्र सुधार गर्न लागिपर्ने पनि प्रतिबद्धता जनाए ।

‘विगतमा भएका असल प्रयत्नहरूलाई निरन्तरता दिँदै काम अघि बढाउँछु । यसअघि पनि विकासमा काम गरिसकेको हुनाले कसरी जानुपर्छ भन्ने कुराको अनुभव छ । राजस्व संकलनमा पनि कहाँ–कहाँ कमजोरी छन् । त्यसमा काम गर्नेछौ’, उनले भने ।

राष्ट्रपति भवन शीतल निवासमा आयोजित शपथपछि उनले बुधबार राति अर्थ मन्त्रालयमा पुगेर पदभार ग्रहण गरेका हुन् । उनलाई अर्थ मन्त्रालयमा सचिवसहितका कर्मचारीहरुले स्वागत गरेका थिए ।