काठमाडौं । शुक्रबार राजीनामा दिएका नेपाल प्रहरीका डिआइजी अर्जुन चन्द ठकुरी विवादमा परिरहने प्रहरी अधिकारी हुन् । खासगरी कमजोर कमाण्ड कारण उनी विवादमा पर्दछन् ।

कमाण्ड लगायत विवादकै कारण उनले राजीनामा दिएको प्रहरी स्रोत बताउँछ । २०५२ सालमा इन्स्पेक्टर पदबाट भर्ना भएका उनी पहिलेदेखि नै कमाण्डमा कमजोर रहेको ब्याचीहरु बताउँछन् ।

डिएसपी हुँदा जमिम शाह हत्यामा संलग्न भारतीय अपराधीसँग उनको कनेक्सन देखिएको थियो । उनी त्यसबेला डिएसपी थिए । उनीसँगै गणेश चन्द, सुरेन्द्र सिंह लगायत प्रहरीसँग हत्याका योजना भारतीयले भेटेका थिए।

पूर्व डिएसपी जगदीश चन्द त गिरोहमै सामेल थिए । त्यो घटनामा अर्जुनमाथि पनि छानबिन भएको थियो, तर त्यसबेला प्रहरी नेतृत्वमा सुदूरपश्चिममा उच्च अधिकारी भएकाले जोगिए । पछि एसपीमा उनी कैलालीमा बसे । त्यहाँ पनि उनी बारम्बार विवादमा परेका थिए ।

डिआइजीमा बढुवा भएपछि विमानस्थलमा पोष्टिङ भएका उनी सुरुदेखि नै कमजोर देखिएका थिए । विमानस्थलमा अन्य निकायसँग समन्वय कमजोर देखिएको थियो । भिजिट भिसामा भाग खोजेपछि टकराब बढेको थियो । त्यही टकराब बढेर अघिल्लो शुक्रबार कुटाकुट भयो ।

जसमा प्रहरीलाई दोषी देखाउँदै असई प्रकाश चौधरीलाई निलम्बन गरियो । घटनाको दिन डिआइजी चन्द विदामा थिए । छानबिन समितिले डिआइजीको समेत कमजोरी औँल्याएको छ ।

विमानस्थलका एक अधिकारीका अनुसार उनको ध्यान काममा थिएन । हरेक महिना एक हप्ता बिदा बस्दथे । दुई महिनाअघि एयरलाइन्स कम्पनीसँग निःशुल्क टिकट मागेको घटना बाहिरिएको थियो ।

काममा लापरबाही गरेको विषयलाई लिएर प्रहरी महानिरीक्षक बसन्तबहादुर कुँवरले पनि उनको ध्यानाकर्षण गराउँदै आएका थिए । यही क्रममा उनले राजीनामा दिएका छन् । राजीनामा स्वीकृत भने भइसकेको छैन ।