मुगु । मुगुमा सिजनल भाइरल ज्वरोका कारण तीन जनाको मृत्यु भएको छ । जिल्लाको उत्तरी भेगमा पर्ने सोरु गाउँपालिका-६ पुरुमुरु गाउँमा भाइरल ज्वरोका कारण तीन जनाको मृत्यु भएको हो ।

एक साता अगाडिबाट फैलिएको मौसमी रुघाखोकीले पुरुमुरु गाउँका तीन जनाको मृत्यु भएको र गाउँभरि सर्वसाधारण थला परेको जानकारी जिल्ला अस्पतालमा पुगेपछि जिल्ला अस्पतालबाट उक्त स्थानमा डा. कमल ढुंगानाको नेतृत्वमा स्वास्थ्यकर्मीको टोली सोरु गाउँपालिका-६ पुरुमुरु र जिमा गाउँ पुगेको थियो ।

सोरु गाउँपालिका-६ का तीन बस्ती परुमुरु, जिमा र बन्जाहमा मौसमी रुघाखोकी लागेका १ सय ५० मध्ये १ सय ३५ जनामा एकैखाले लक्षण देखिएको बताइएको छ ।

मौसमी रुघाखोकीका कारण एक साता यता सोरु गाउँपालिका-६ पुरुमुरु गाउँका ७२ वर्षीय हरिबहादुर शाही, सोही गाउँकी ७५ वर्षीया कृति छत्याल र २४ वर्षीया कुसुम ढोलीको मृत्यु भएको स्थानीयले जनाएका छन् ।