काठमाडौँ । सरकारले भिजिट भिसामा विदेश प्रस्थानको विद्यमान अवस्थालाई पुनर्विचार गरी थप सहजीकरण र व्यवस्थित गर्ने भएको छ ।

बिहीवार गृह मन्त्रालयमा उपप्रधानमन्त्री एवम् गृहमन्त्री नारायणकाजी श्रेष्ठसहितको बैठकले यस्तो निर्णय गरेको हो ।

भिजिट भिसालाई सहज र व्यवस्थित बनाउन बैठकले छिट्टै नयाँ निर्णय गर्न आवश्यक ठानेको र प्रधानमन्त्रीसँगको परामर्शपश्चात् अन्तिम निर्णय गरिने निष्कर्ष निकालिएको गृहमन्त्रीको सचिवालयले जनाएको छ ।

बैठकले यसबारे छिट्टै नयाँ निर्णय गर्नु आवश्यक देखिएको भन्दै प्रधानमन्त्रीसँगको परामर्श एवम् निर्देशनपश्चात् अन्तिम निर्णय गर्ने निष्कर्ष निकालेको छ ।

बैठकमा प्राप्त सुझावसहित आवश्यक प्रस्तावको तयारी गर्न गृहमन्त्री श्रेष्ठले अध्यागमन विभागलाई निर्देशनसमेत दिएका छन् ।

बैठकमा गृहमन्त्री श्रेष्ठसहित श्रममन्त्री, परराष्ट्र, शिक्षा, श्रम सचिव र सम्बद्ध पदाधिकारीको सहभागिता रहेको थियो ।