कास्की । गाईलाई ठक्कर दिएर फरार रहेका यात्रुवाहक बसका चालकलाई कास्की प्रहरीले पक्राउ गरेको छ । पक्राउ पर्नेमा धादिङ रोराङ नगरपालिका वडा नम्बर ३ बस्ने २८ वर्षीय रोशन ठकुरी रहेका छन् ।

सोमबार विहान पोखरा महानगरपालिका वडा नम्बर १० औधोगिक क्षेत्रस्थित पृथ्वी राजमार्गमा पोखरादेखि काठमाडौंतर्फ जाँदै गरेको ना ५ ख २११३ नंम्बरको यात्रुवाहक बसले बाटोमा हिडिरहेको गाईलाई ठक्कर दिएको थियो । उक्त गाईको घटनास्थलमै मृत्यु भएको जिल्ला प्रहरी कार्यालय कास्कीले जनाएको छ ।

उक्त ठक्कर दिने सवारी साधन भागी फरार रहेको भन्ने सूचनाको आधारमा जिल्ला प्रहरी कार्यालय कास्की, मातहत प्रहरी कार्यालय र अन्य कार्यायलहरुबाट समेत खोजतलास गर्दै जाँदा जिल्ला तनहुँ शुक्लागण्डकी नगरपालिका वडा नम्बर ५ बेलचौतारा स्थितबाट उक्त नम्बरको बससहित चालकलाई पक्राउ गरिएको हो ।

उनलाई कास्की जिल्ला अदालतबाट पशुपंक्षी सम्बन्धी मुद्दामा १० दिनको म्याद थप गरी प्रहरीले अनुसन्धान प्रकृया अगाडी बढाइएको छ ।