एजेन्सी । आईसीसी एकदिवसीय विश्वकप क्रिकेटमा साबिक विजेता इंग्ल्याण्डले नेदरल्याण्ड्सलाई पराजित गरेको छ । बुधबार पुणेमा भएको खेलमा इंग्ल्याण्ड १६० रनको विशाल अन्तरले विजयी भएको हो ।

इंग्ल्याण्डले प्रस्तुत गरेको ३४० रनको लक्ष्य पछ्याउने क्रममा नेदरल्याण्ड्सले ३७.२ ओभरमा सबै विकेट गुमाएर १७९ रन मात्र बनाउन सक्यो ।

नेदरल्याण्ड्सका लागि तेजा निदामानुरुले सार्वधिक ४१ रन बनाए भने कप्तान स्कट एडवार्डस्ले ३८ तथा साईब्रान्ड एन्जेलबर्चले ३३ रनको योगदान दिए ।

इंग्ल्याण्डका लागि मोइन अली र आदिल रसिदले ३–३ विकेट लिए भने डेभिड विलीले दुई तथा क्रिस वोक्सले १ विकेट लिए । यसअघि बेन स्टोक्सको शतकको मद्दतले इंग्ल्याण्डले निर्धारित ५० ओभरमा ९ विकेटको क्षतिमा ३३९ रन बनाएको थियो ।

प्रतियोगितामा इंग्ल्याण्डको यो दोस्रो जित हो । यो जितले इंग्ल्यान्डको च्याम्पियन्स ट्रफिका लागि छनोट हुने सम्भावना कायम रह्यो । अर्कोतर्फ हारले नेदरल्यान्ड्सको सेफिमाइनल प्रवेशको गणितीय सम्भावना पनि समाप्त भएको छ ।

८ खेलपछि इंग्ल्याण्डको ४ अंकसहित नेट रनरेटको आधारमा सातौँ स्थानमा उक्लिएको छ । समान अंक बोकेको नेदरल्याण्ड्स भने अंक तालिकामा पुछारमा रहेको छ ।