काठमाडौं । दक्षिण अफ्रिकाले इंग्ल्याण्डमाथि शानदार जित निकालेको छ । शनिबार भएको खेलमा दक्षिण अफ्रिकाले इंग्ल्याण्डलाई २ सय २९ रनको विशाल अन्तरले हराएको हो ।

दक्षिण अफ्रिकाले प्रस्तुत गरेको ४ सय रनको लक्ष्य पछ्याउने क्रममा इंग्ल्याण्डले २२ ओभरमा सबै विकेट गुमाउँदै मात्र १ सय ७० रन बनाउन सक्यो ।

इंग्ल्याण्डका लागि मार्क वुडले ४३ तथा गुस एट्किन्सनले ३५ रन बनाउनुबाहेक अन्य ब्याट्सम्यानले ठुलो योगदान दिन सकेनन् । दक्षिण अफ्रिकाका लागि जेलाल्ड कोटजीले ३ तथा लुंगी एनगिडी र मार्को यानसेनले दुई–दुई विकेट लिए ।

यसअघि टस हारेर पहिलो ब्याटिङ गरेको दक्षिण अफ्रिकाले निर्धारित ५० ओभरमा ७ विकेटको क्षतिमा ३ सय ९९ रन बनाएको थियो । दक्षिण अफ्रिकाका हेनरिक क्लासेनले शतक बनाए ।

उनी ६७ बलमा १०९ रन बनाएर आउट भए । यस्तै रेजा हेन्ड्रिक्सले ८५ र मार्को जानसेनले नटआउट ७५, रसी भान डेर डसेनले ६० रन बनाए । इंग्ल्याण्डका लागि रिस टोप्लेले ३ तथा गस एट्किन्सन र अदिल रसिदले २–२ विकेट लिए ।