काठमाडौं । नेपाली राष्ट्रिय टिमका लेग स्पिनर सन्दीप लामिछानेको बलत्कार मुद्दाको फाइनल पेसी आजका लागि तय भएको छ ।

असोजमा दुई पटक पेसी चढेर पनि अदालतबाटै स्थगित भएको सन्दीपको मुद्दामा बिहीबार फाइनल बहस हुने भएको हो ।

यसअघि गत १ असोजमा सन्दीपको मुद्दा पेसीमै नचढी स्थगित भएको थियो। गोलप्रथापछि मुद्दा केशवप्रसाद घिमिरेको इजलासमा तय भएपनि उनी बिदामा भएका कारण मुद्दा स्थगित हुन पुग्यो ।

त्यसपछि ७ असोजका लागि तय भएको सन्दीपको मुद्दा फेरी पनि पेसीमै नचढी अदालतलेनै स्थगित गरेपछि सन्दीप एसियाली खेलकुद प्रतियोगिता एसियाडका लागि चीन प्रस्थान गरेका थिए ।

१७ वर्षकी एक किशोरीले आफूमाथि काठमाडौंको एक होटलको ३०५ नम्बर कोठामा लगेर पटक–पटक बलात्कार गरेको भन्दै गत भदौ २१ गते प्रहरी वृत्त गौशालमा जाहेरी दिएकी थिइन्।