काठमाडौं । चेक रिपल्बिक पठाइदिन्छु भन्दै ठगी गर्ने दुईजना पक्राउ परेका छन् । झापा घर भई नयाँ बानेश्वर बस्ने अमृत कार्की र अशोक कार्कीलाई झण्डै ४१ लाख रकम ठगी गरेको अभियोगमा भंगालबाट पक्राउ गरिएको हो ।

काठमाडौं उपत्यका अपराध अनुसन्धान कार्यालयका अनुसार दाताराम भट्टराईसमेत ५० जनालाई वैदेशिक रोजगारीको लागि चेक रिपब्लिक पठाईदिन्छु भनेर ठगी गरेको उजुरी परेपछि बुधबार साँझ उनीहरु पक्राउ परेका छन् ।

उनीहरुले ओरा करियर नामको कन्सल्टेन्सी खोलेर पीडितहरुबाट पटकपटक गरी ४० लाख ८४ हजार रकम ठगी गरेको आरोप छ । ठगीपश्चात् उनीहरू सम्पर्कविहीन भएको पीडितहरूले उजुरी दिएका थिए ।

उनीहरुले प्रतिव्यक्ति ८ लाख रुपैयाँ लाग्ने र मासिक १ लाख कमाई हुने भन्दै ठगी गरेपछि वैदेशिक रोजगार विभागले पक्राउ गर्न प्रहरीलाई पत्राचार गरेको थियो । उनीहरुलाई थप अनुसन्धान तथा कारवाहीको लागि प्रहरीले वैदेशिक रोजगार विभाग ताहाचल बुझाएको छ ।