सिन्धुली । सिन्धुलीको दुधौली नगरपालिकाले कानुन विपरीत विद्यालय बन्द नगर्न शिक्षकहरूलाई आग्रह गरेको छ ।

शिक्षकहरू आन्दोलनमा सहभागी हुन विद्यालय बन्द गर्ने सूचनाका सन्दर्भमा विज्ञप्ति निकाल्दै नगरपालिकाले कानुन विपरीत विद्यालयमा नियमित पठनपाठन नगरेको पाइएमा कानुनअनुसार कारबाही गर्ने चेतावनी दिएको हो ।

नगरपालिकाले निकालेको विज्ञप्तिमा आफ्ना माग कानुन बमोजिम सम्बन्धित निकायमा राख्न पाउने अधिकार भए पनि आफ्नो अधिकार प्रयोग गर्दा अर्काको अधिकार हनन गर्न नहुने उल्लेख छ ।

शिक्षा मन्त्रालयले बोलाएको वार्तामा समेत सहभागी नभई आन्दोलनका कार्यक्रम घोषणा गरेको पाइएको भन्दै विद्यालय बन्द नगरि नियमित पठनपाठन गराउन नगरपालिकाका प्रवक्ता दीपक खड्काले जारी गरेको विज्ञप्तिमा भनिएको छ ।