काठमाडौं । प्रधानमन्त्री पुष्पकमल दाहाल ‘प्रचण्ड’ संयुक्त राष्ट्रसंघको ७८ औँ महासभामा भाग लिन आज न्युयोर्क जाँदैछन् । उनी शनिबार साँझ ६ बजे संयुक्त राष्ट्रसंघको मुख्यालय अमेरिका प्रस्थान गर्न लागेका हुन् ।

परराष्ट्र मन्त्रालयका अनुसार असोज ४ गते प्रधानमन्त्री प्रचण्डले राष्ट्रसंघको महासभालाई सम्बोधन गर्ने कार्यतालिका रहेको छ।

यस्तै अमेरिकामा रहँदा उनेले राष्ट्रसंघको दिगो विकास लक्ष्यसम्बन्धी शिखर सम्मेलन र जलवायु महत्वाकाङ्क्षा शिखर सम्मेलनमा पनि सम्बोधन गर्ने कार्यक्रम रहेको छ ।

प्रधानमन्त्री प्रचण्डले असोज २ मा संयुक्त राज्य अमेरिकाका राष्ट्रपति जो वाइडेनले आयोजना गर्ने जलपान कार्यक्रममा समेत सहभागी हुनेछन् । प्रधानमन्त्री प्रचण्ड अमेरिकाबाट असोज ५ गते सीधै चीन जाने कार्यतालिका छ ।

भ्रमणमा परराष्ट्रमन्त्री एनपी साउद, परराष्ट्रसचिव भरतराज पौड्याल, स्वकीय सचिव गंगा दाहाललगायत सहभागी हुने प्रधानमन्त्री प्रचण्डले शुक्रबारको संसद् बैठकमा आफ्नो भ्रमणबारे जानकारी गराएका थिए।