काठमाडौं । आपराधिक लाभ (एक्सटोर्सन) लिएको आरोपमा प्रहरीले एक जनालाई पक्राउ गरेको छ ।

धम्की तथा कुटपिट गरेर जबरजस्ती २० लाख रुपियाँको चेक र साढे आठ लाख रुपियाँको कागज गराएको आरोपमा काठमाडौं महानगरपालिका ३२ बस्ने ३३ वर्षीय सुरजकुमार श्रेष्ठलाई काँडाघारीबाट पक्राउ गरिएको हो ।

काठमाडौं उपत्यका अपराध अनुसन्धान कार्यालयले उनलाई पक्राउ गरेको हो । उनीसहित केही व्यक्तिहरूले भदौ २० गते काँडाघारीस्थित घरजग्गा कारोबार तथा ड्राइभिङ सेन्टर संचालन गर्ने कार्यालयमा पीडितलाई बन्धक बनाएका थिए ।

उनले पीडित बोले वा कराएमा ज्यान समेत मार्ने धम्की दिएर २० लाखको चेक र साढे ८ लाख कागज गराएको उपत्यका अपराध अनुसन्धान कार्यालयले जनाएको छ । यसरी आपराधिक लाभ लिएको उजुरी परेपछि प्रहरीले उनलाई पक्राउ गरेको हो ।

आपराधिक लाभ लिन नहुने कसुरमा म्याद थपेर अनुसन्धानका लागि जिल्ला प्रहरी परिसर काठमाडौं‌‌मा पठाएको कार्यालयले जनाएको छ। यसमा संलग्न अन्य व्यक्तिहरू फरार छन् । उनीहरूको पनि खोजी भइरहेको प्रहरीले जनाएको छ ।