काठमाडौं । नेकपा माओवादी केन्द्रले देशभर एकसाथ ‘जनतासँग माओवादी विशेष रूपान्तरण अभियान’ सुरु गरेको छ।

प्रधानमन्त्रीसमेत रहेका पार्टी अध्यक्ष पुष्पकमल दाहाल ‘प्रचण्ड’ले केही बेरअघि पार्टी मुख्यालय पेरिसडाँडाबाट अभियानको भर्चुअल उद्घाटन गरेका हुन् ।

उद्घाटन कार्यक्रममा बोल्दै अध्यक्ष प्रचण्डले जनसम्बन्ध कमजोर हुँदै जाने परिस्थितिसँग सिर्जना भएको संकट चिर्न अभियानले नयाँ प्राण भर्ने बताए । उनले पार्टीको जीवन र जनताको सपना पूरा गर्ने ऐतिहासिक दिन आजलाई बनाउनुपर्ने बताए ।

उनले आजको युगको नेतृत्व गर्ने विचार निर्माण गर्ने आधार तयार पार्ने उल्लेख गरे । विशेष रुपान्तरण अभियानले जनतामाझ पुगेर आजको युग सापेक्ष अग्रगामी सभ्य राजनीतिक संस्कार र चिन्तनको समेत विकास गर्न मद्दत पुग्ने उनको विश्वास छ ।