विराटनगर । कोशी प्रदेशसभाको आजको बैठक एमाले र राप्रपाको बहिष्कारका कारण स्थगित भएको छ । बैठक सुरु भएलगत्तै एमाले र राप्रपाका सांसदहरू उठेर विरोध जनाएपछि बैठक स्थगित भएको हो ।

गत सोमबारको प्रदेश सभा बैठकको अध्यक्षता गरेका कांग्रेसका इस्त्राइल मन्सुरीले मुख्यमन्त्री उद्धव थापालाई विश्वासको मत दिएका थिए । सो प्रकरणको विरोध गर्दै विपक्षी दलहरु एमाले र राप्रपाले संसदीय परम्परा विपरीत भएको भन्दै बुधबारको बैठक बहिष्कार गरेका हुन् ।

त्यसक्रममा प्रदेशसभामा बोल्दै एमालेका सांसद तिलकुमार मेन्याङ्बोले सभाध्यक्षको कुर्सीमा बसेर मुख्यमन्त्री उद्धव थापालाई संविधान विपरीत विश्वासको दिएको भन्दै विरोध जनाएका थिए । उनले सभाध्यक्षले अरु पनि गैर संवैधानिक कार्य गर्न सक्ने देखिएको भन्दै नाराबाजी सुरु गरेका थिए ।

त्यसपछि एमाले र राप्रपाका सबै सांसदहरू बैठक छोडेर हिँडेपछि प्रदेशसभा बैठक स्थगित भएको हो ।