काठमाडौं । नेपाली कांग्रेस केन्द्रीय कार्यसमिति बैठक लाइभ हुने भएको छ ।

आजबाट सुरु हुने केन्द्रीय कार्यसमिति बैठक कांग्रेसको आधिकारिक फेसबुक पेजबाट प्रत्यक्ष प्रशारण हुने भएको हो । पार्टी सभापति शेरबहादुर देउवाको निर्देशन अनुसार तयारी थालिएको छ ।

पार्टी केन्द्रीय कार्यालयले आज दिउँसो १ बजेदेखि सुरु हुने बैठकको लाइभ गर्ने तयारी गरेको हो । बैठकमा पहिलो एजेन्डाको रूपमा समसामयिक विषय, राजनीतिक, आर्थिक, सामाजिक, परराष्ट्र र सुशासनसँग सम्बन्धित विषयहरूमा छलफल हुनेछ ।

सांगठनिक कार्य योजना र कार्य तालिका प्रस्तुत हुनेछ भने कार्यसम्पादन समितिले गरेका निर्णयहरू अनुमोदनको प्रस्ताव, निर्वाचन परिचालन समितिको प्रतिवेदन पेश र पार्टीको नीति अधिवेशनसँग सम्बन्धित खाका पनि प्रस्तावित हुनेछन् ।

केन्द्रीय कार्य समिति बैठकमा विभाग गठनको प्रस्ताव, पार्टीले सञ्चालन गर्ने राष्ट्रवादी अभियानको खाका प्रस्तुत, अनुशासन समितिको प्रतिवेदन पेश गर्ने एजेन्डा पनि रहेको छ ।