मकवानपुर । बागमती प्रदेशसभाका विपक्षी दलहरूको अवरोधपछि प्रदेशसभा बैठक स्थगित गरिएको छ ।

गत असार १२ बाट सुरु भएको बैठकमा अवरोध गर्दै आएका प्रमुख प्रतिपक्ष दल एमाले सहित राप्रपा तथा नेपाल मजदुर किसान पार्टी विरोध गर्दै संसदमा आजपनि अवरोध गरेका छन् ।

आज बैठकको सुरुमा नेपाल मजदुर किसान पार्टीका संसदीय दलका नेता सुरेन्द्रराज गोसाईले धारणा राखेपछि विपक्षको नाराबाजीसँगै बैठक स्थगित भएको हो ।

प्रदेशसभामा आफ्नो धारणा राख्दै गोसाईले बजेट पक्षपाती भएको भएको भन्दै आफुहरुको पार्टीले यो जनविरोधी बजेटको बिरोध गरेको बताए । बैठकमा नाराबाजी चर्किएपछि सभामुख भुवनकुमार पाठकले बैठक बेलुकी साँढे ५ बजेसम्मको लागि स्थगित गरेका हुन् ।

गत असार १ गते प्रदेश सरकारले सार्वजनिक गरेको आगामी आर्थिक वर्ष २०८०-०८१ को बजेट माथिको छलफल अझै सुरु हुन सकेको छैन ।