काठमाडौं । नेकपा एमालेका अध्यक्ष केपी शर्मा ओलीले नक्कली भुटानी शरणार्थी प्रकरणको छानबिनमा प्रधानमन्त्री पुष्पकमल दाहाल प्रचण्डले कसैलाई बचाउने र कसैलाई फसाउने अभिव्यक्ति दिएको टिप्पणी गरेका छन् ।

आइतबार संघीय संसद् भवनमा आयोजित पार्टी संसदीय दलको बैठकमा बोल्दै उनले प्रधानमन्त्री प्रचण्डको निष्पक्षतामाथि प्रश्न उठाएका हुन् ।

अध्यक्ष ओलीले प्रधानमन्त्री दाहालले कसैलाई बचाउने र कसैलाई फसाउने नियतका साथ ‘म कसैलाई छाड्दिनँ’ भन्ने अभिव्यक्ति दिएको जिकिर गर्दै त्यसलाई सफल हुन नदिने चेतावनीसमेत दिएका छन् ।

आइतबार संघीय संसद् भवनमा आयोजित पार्टी संसदीय दलको बैठकमा बोल्दै उनले छोड्नका लागि कसले दबाब दिएको हो ? प्रस्ट पार्न पनि प्रधानमन्त्री दाहाललाई सचेत गराए ।

प्रधानमन्त्री दाहालले शनिबार ओलीसँगको भेटपछि आफूले कसैलाई पनि नछाड्ने अभिव्यक्ति दिएका थिए । त्यसप्रति ओलीले आपत्ति जनाएका हुन् ।