मकवानपुर । मकवानपुर प्रहरीले लागूऔषध गाँजासहित २ जनालाई पक्राउ गरेको छ ।

पक्राउ पर्नेमा कैलाश गाउँपालिका वडा नम्बर–४ कटुन्जे बस्ने ४२ वर्षिय राधाकृष्ण रिजाल र ३८ वर्षिय उत्तम रिजाल रहेका छन् ।

उनीहरुलाई कटुन्जेबाट ५ सय ११ किलो ९०० ग्राम लागूऔषध गाँजा सहित पक्राउ गरिएको जिल्ला प्रहरी कार्यालय मकवानपुरले जनाएको छ ।

रिजाल द्वयको घरमा लागू औषध गाँजा लुकाई छिपाई राखेको भन्ने बिशेष सुचनाको आधारमा जिल्ला प्रहरी कार्यालय मकवानपुरबाट २६ जनाको प्रहरी टोली खटी खानतलासी गर्दा गाँजा फेला परेको थियो ।

प्रहरीले उत्तम रिजालको घरबाट ६ बोरा १८४ किलो १०० ग्राम र नगद ५५, हजार ३६५ रुपैयाँ र राधाकृष्ण रिजालको घरबाट १२ बोरा ३२७ किलो ८०० ग्राम गाँजा फेला पारेको हो ।

उनीहरुको साथबाट प्रहरीले ५५ हजार ३६५ रुपैयाँ नगद समेत बरामद गरेको जिल्ला प्रहरी कार्यालय मकवानपुरले जनाएको छ । पक्राउ परेका दुवै जनालाई हिरासतमा राखि अनुसन्धान कार्य भइरहेको प्रहरीले जनाएको छ ।