काठमाडौं । उपप्रधान एवं गृहमन्त्री रवि लामिछानेले आफ्नो सुरक्षामा खटिने अगुवा र पछुवा गाडी हटाएका छन् ।

गृहमन्त्रीको सुरक्षामा खटिने प्रहरी निरीक्षक नेतृत्वको टोलीलाई पनि घटाएर प्रहरी नायब निरीक्षक (सई) को नेतृत्व सुरक्षाकर्मी राखेको उनले शुक्रबार साँझ फेसबुकमा जानकारी गराएका हुन् ।

आफू मात्र उच्च सुरक्षा घेरामा हिँडडुल गरेर नागरिक अपेक्षा पूरा नहुने उनको जिकिर छ । ‘उपप्रधानमन्त्री तथा गृहमन्त्रीको सवारीका क्रममा रहने अगुवापछुवा सुरक्षाकर्मी सहितको गाडी हटाएर मैले आजैबाट अगाडि एउटामात्र गाडी सुरक्षामा राख्ने निर्णय गरेको छु । भैपरी आउँदाको परिस्थितिलाई अपवाद मानिदिनु होला,’ सामाजिक सञ्जाल फेसबुकमा स्ट्याटस लेख्दै उनले भनेका छन् ।

यस्तै उनले आफू सधैँ ट्राफिक नियमको पालना गर्ने पनि बताएका छन् । ‘सडक लेन अनुशासन पूर्ण पालना गर्ने गराउने कुरामा प्रतिबद्ध छु । कुनै अकाट्य परिस्थिति आई पर्दाबाहेक म आफनो कार्यकालभरि नै यी नियम पालना गर्छु,’ उनले भनेका छन् ।