काठमाडौं । अख्तियार दुरुपयोग अनुसन्धान आयोगले नदीजन्य पदार्थ अनुमति पाएको भन्दा बढी उत्खनन् गर्न सहयोग गरेको भन्दै दुई जनाविरुद्ध भ्रष्ट्राचार मुद्धा दायर गरेको छ ।

आयोगले झापाको दमक नगरपालिकाका वातावरण अधिकृत ज्ञानेन्द्र चौधरी र मिक्लाजुङ्ग गाउँपालिका मोरङ्गका सव इन्जिनियर विवेक कार्कीविरुद्ध मुद्धा दायर गरेको हो ।

ठेकेदारले अनुमति पाएको भन्दा धेरै नदीजन्य पदार्थ उत्खनन गरेको थाहा पाउँदा पाउँदै कर्मचारीले नियन्त्रणमा उदासिन भएको र स्थानीय तहलाई राजस्व हानी नोक्सानी पुर्‍याएको अख्तियारले जनाएको छ ।

उनीहरुविरुद्ध ३ करोड ४४ लाख ११ हजार २८८ रुपैयाँ २५ पैसा राजस्व नोक्सान गरेको दावीसहित विशेष अदालतमा भ्रष्ट्राचार मुद्दा दायर गरिएको हो ।

मावा खोला उत्खननका लागि किशन एण्ड दृष्टी बिल्डर्स प्रालिले ठेक्का पाएको थियो । उक्त कम्पनीले अनुमति प्राप्त परिमाणभन्दा बढी नदीजन्य पदार्थ उत्खनन् गर्दा त्यसलाई समयमै नियन्त्रण गर्ने र समयमै आफ्नो कार्यालयमा जानकारी गराउनुपर्नेमा जिम्मेवारीबाट विमुख भई पालिकाको राजस्व नोक्सानी गराएको अख्तियारको दावी छ ।

दमक नगरपालिकाका कर्मचारी ज्ञानेन्द्र चौधरी र मिक्लाजुङका विवेक कार्कीले नदीजन्य पदार्थ के कति परिमाणमा उत्खनन् भएको थियो भनी स्थलगत जाँचबुझ एवं मुचुल्कासमेत उठाई यकिनका साथ प्रतिवेदन पेस गर्नुपर्नेमा हचुवाको भरमा उत्खनन् गरेको भन्दा घटी परिमाण उल्लेख गरी झुट्टो प्रतिवेदन दिएको अख्तियारले बताएको छ ।

अख्तियारले ठेकेदार किशन एण्ड दृष्टी विल्डर्स प्रालिका सञ्चालक पशुपति उप्रेती र उनका प्रतिनिधि निशम कार्कीले सम्झौता विपरीत बढी नदीजन्य पदार्थ उत्खनन् गरी गैरकानूनी लाभ लिएको र स्थानीय तहको राजस्व नोक्सान पुर्‍याएको भन्दै उनीहरुविरुद्ध पनि भ्रष्ट्राचार मुद्दा दायर गरेको छ । उनीहरुविरुद्ध पनि ३ करोड ४४ लाख ११ हजार २८८ रुपैयाँ विगो माग गरिएको अख्तियारले जनाएको छ