काठमाडौं । नेपाल प्रहरीले जाडोको समयमा झ्यालढोका बन्द गरी हिटर र कोइला नबाल्न आग्रह गरेको छ ।

जिल्ला प्रहरी परिसर काठमाडौंले मंगलबार एक सूचना जारी गर्दै यस्तो आग्रह गरेको हो ।

हालैका दिनमा चिसो बढिरहेको हुँदा चिसोबाट जोगिन हिटर, कोइला बालेर कोठा तातो बनाउनेलगायतको कार्यबाट कोठाभित्रको सम्पूर्ण अक्सिजन नष्ट हुने भएकाले झ्यालढोका बन्द गरी हिटर र कोइला नबाल्न प्रवक्ता, प्रहरी उपरीक्षक दिनेशराज मैनालीले आग्रह गरे ।

उनले चिसोबाट जोगिन झ्यालढोका बन्द गरेर हिटर तथा कोइला बाल्दा अक्सिजन नष्ट हुने साथै कार्बन मनोअक्साइडसमेत बनी कोठाभित्र रहेका मानिसमा टाउको दुख्ने, रिङ्गटा लाग्ने, निस्सासिइ बहोस हुने र थाहै नपाइ दुःखद् निधन हुने घटना बढेको बताए । त्यसकारण सो कार्य नगर्न अनुरोध गरिएको उनको भनाई छ ।