काठमाडौं। देशका विभिन्न स्थानमा अवैध लागूऔषधसहित आठ जनालाई प्रहरीले पक्राउ गरेको छ। झापाकोबुद्धशान्ती गाउँपालिका ३ बुद्धटोलबाट एक सय २ ग्राम अवैध लागूऔषध ब्राउन सुगरसहित कचनकवल गाउँपालिकाका ३१ वर्षीय मोहमद हुसेनलाई शनिबार बेलुकी प्रहरीले पक्राउ गरेको हो ।

लागूऔषध नियन्त्रण ब्यूरो काँकरभिट्टा र ईलाका प्रहरी कार्यालय धुलाबारीबाट खटिएको संयुक्त प्रहरी टोलीले जाँच गर्ने क्रममा हुसेनलाई उक्त पदार्थ सहित फेला पारी पक्राउ गरेको हो ।

प्रहरीले अनुसन्धानको क्रममा उक्त लागूऔषध मेचीनगर नगरपालिका-८ मेची आवास बस्ने २८ वर्षीय बिकाश राजबंशीले खरिद गरी ल्याएको भन्ने खुल्न आएपछि प्रहरीले राजबंशीको कोठाबाट थप २५ ग्राम २ सय ५० मिलिग्राम अवैध लागूऔषध ब्राउन सुगर र १ थान डिजिटल तराजु बरामद गरेको छ ।

हाल बिकाश राजबंशी फरार रहेको प्रहरीले जनाएको छ । यस्तै सिरहाको धनगढीमाई नगरपालिका-५ तेतिस बिघास्थित सडकबाट १० ग्राम ९ सय २० मिलिग्रामअवैध लागूऔषध ब्राउन सुगर र नगद २९ हजार रूपैयाँसहित २ जनालाई शनिबार दिउँसो प्रहरीले पक्राउ गरेको छ ।

स ८ प २२९९ नम्बरको मोटरसाइकलमा सवार उनीहरूलाई ईलाका प्रहरी कार्यालय लहानबाट खटिएको प्रहरीले जाँच गर्ने क्रममा उक्त पदार्थ र नगद सहित फेला पारी पक्राउ गरेको हो ।

बर्दियाको बढैयाताल गाउँपालिका-२ बैसठ्ठी नम्बर पिलर चोक फुटाहबाट अवैध लागूऔषध ब्राउन सुगर जस्तो देखिने पदार्थ २ ग्राम ८ सय ५० मिलिग्राम सहित बाँके खजुरा गाउँपालिका-६ बस्ने १८ वर्षीय किशोर समेत २ जनालाई शनिबार दिउँसो प्रहरीले पक्राउ गरेको छ ।

प्रहरी चौकी जमुनीबाट खटिएको प्रहरीले भे १२ प ४१९७ नम्बरको स्कुटरलाई जाँच गर्ने क्रममा स्कुटरमा सवार उनीहरूलाई उक्त पदार्थ सहित फेला पारी पक्राउ गरेको हो ।

प्रहरीले कैलालीको धनगढी उपमहानगरपालिका१ कारागार नजिकबाट २४ वर्षीय आयुष सिंहलाई अवैध लागूऔषध खैरो हेरोईनसहित पक्राउ गरेको छ ।

करिब १ ग्राम खैरो हेरोईनसहित शनिबार दिउँसो प्रहरीले पक्राउ गरेको हो । प्रहरीले दाङको लमही नगरपालिका ९ अमिलियाबाट ३ सय ९५ ग्राम अवैध लागूऔषध चरेशसहित दुई जनालाई पक्राउ गरेको छ ।

प्रदेश ३-०२-००२ प ७९२३ नम्बरको मोटरसाइकलमा सवार उनीहरूलाई ईलाका प्रहरी कार्यालय अमिलियाबाट खटिएको प्रहरीले जाँच गर्ने क्रममा उक्त पदार्थ सहित फेला पारी दुबै जनालाई पक्राउ गरेको केन्द्रीय प्रहरी समाचार कक्षले जनाएको छ ।