कैलाली । कैलालीमा दुईजना प्रहरी जवानमाथि कुटपिट भएको छ । जिल्लाको जानकी गाउँपालिकास्थित वडा नम्बर ३ मा बुधबार राति ११ बजेतिर प्रहरीमाथि हातपात भएको हो ।

टीकापुरस्थित इलाका प्रहरी कार्यालयमा कार्यरत दुईजना जवान कुटिएका हुन् । इलाका प्रहरी कार्यालय टीकापुरका प्रमुख प्रहरी नायब उपरीक्षक हेमबहादुर शाहीका अनुसार प्रहरी जवान जनक ठकुल्ला र एक जना अर्का प्रहरी जवानमाथि हातपात तथा कुटपिट भएको हो ।

सो क्षेत्रमा रात अबेरसम्म दसैंको रात्रिकालीन सांस्कृतिक कार्यक्रम चलिरहेको जानकारीपछि प्रहरीहरु पुगेका थिए । त्यहाँ पुगेर उक्त कार्यक्रम बन्द गर्न भनेपछि स्थानीय र प्रहरीबीच झडप भएको बताइएको छ । यस्तै प्रहरीले जवानमाथि कुटपिटको आरोपमा तीन जनालाई पक्राउ गरेको छ ।

जानकी गाउँपालिकास्थित वडा नम्बर ३ का लक्ष्मण चौधरी, आशाराम चौधरी र राम चौधरीलाई पक्राउ गरिएको हो। उनीहरुलाई समातेर अनुसन्धान भइरहेको प्रहरीले जनाएको छ।